再戰九州2009 (第六天 15Jan)-博多=太宰府 (上)

一早起身，好溫暖呀間房~ 不過出面都仲係好凍！

由於間房係無洗手間，所以我同美寧出外面梳洗一番就落樓下吃早餐啦

心型旦，仲有日本益力多！

吃飽飽就上樓換件衫，同屋主講聲出去行一陣先番黎攞車走，佢話無問題！黑色果架車就係我地架車啦！

我諗有去過日本既朋友都知呢一間「B Speak」有幾咁出名架啦！今次去湯布院就住試下，點知尋日去佢就賣晒，今朝去佢就未開門，同佢無緣啦！

尋日行左過金鱗湖果邊，今日就向火車站果邊行下啦~ 原來九點幾真係太早啦，條街無乜人！

只係見到有個麵包超人~

湯布院站，到此一遊囉~ 都有諗過下次好唔好坐火車，不過諗諗下要拖住 D 行理神咁早走去趕火車，我同美寧都話咪攪啦~ 哈哈~

仲見到兩個「騎呢怪」~

真係早到無咩好行，攞車走人啦 … 我行程係先去太宰府個酒店 check-in 左先，再去「太空世界」玩~

日本渣車真係輕鬆，渣到 140 都好似開得好慢咁，我成日都話唔知係咪個錶有問題，最高記錄可以去到 160 架！不過大家唔好學呀~

我地今晚就係住呢間野啦！ますやＤｏｎｇ

入去同個老闆講低要去 Shopping，會夜 D 返！個老闆 D 英文都可以架！

向太空世界出發~ 點知~

離遠見到個過山車，好耐都郁過我都心知不妙~ 唔會咁岩掛~

世事既野 … 就咁岩，13 – 16 日，休園日

美寧滿懷希望，今次令佢失望啦~

唉 … 果然係世事難料，上天唔會永遠照顧我地既~ 唯有 … 下次再黎過啦~

我地好失望咁上番車，諗下去邊好啦~ 最後 … 番博多吃一蘭拉麵同行 Outlet 啦

我地俾左高速錢過黎呢邊，唔好再蝕俾佢啦，所以我地回程行國度，悶到美寧訓著左，哈哈~

回程途中見到有個油站 97円一升，立刻打爆個油缸先再講啦~ 呢間係自助油站~

當然我無咁叻啦，企左一陣有我 R 晒頭咁，有個職員見到就過黎幫我手啦

架車吃飽飽啦~ 早知尋日湯布院唔入咁多啦~ 我見自己入，我真係入到好滿架~

行左 215.5 公里？係 1215.5 先真啦！

我地第一站就係去博多運河城吃個一蘭拉麵，因為美寧同我上次吃完都覺得呢間總店係最好吃架啦，今次個行程一定要有囉！

GPS 帶我地去到附近，我地兜左個圈發覺有停車場，就泊入去啦，今次係響日本渣車第一次響街邊泊停車場~ 好自助，完全無人收銀，入場自己攞票，出閘果陣自動收錢機！

入到運河城行一陣 … 搵番一蘭，兩伙失望的心就入去滿足下自己啦~

一人一碗麵再加一隻旦，如果無記錯佢應該加左價，再加埋日元高企，一碗我諗都有加左十蚊八蚊！

一流呀~ 幾時咁好味，不過唔知點解，我地響呢間日本拉麵店吃吃下野，發覺身邊同對面坐既人全部都係講廣東話，好似坐左響香港茶仔咁~ 哈哈~

個旦真係好好味，唔知自己可唔可以煮到好似佢咁好呢？唔知要烚幾多分鐘先岩呢？

吃完拉麵行左一陣，都係攞車去行下 Outlet 啦，不過行邊都好啦， D 野都真係好鬼貴！

<<續>>