本來打算打完遊記先打下心得，但係有個心得要早 D 打先得~ 唔係就會過期，所以都係打下心得先~ 嘻嘻~
<<行>>
今次我既行程係大阪入大阪出，坐印度航空
，我相信大家都聽過好多有關佢既資料，我又不防講下我既個人意見！
首先，要平就預左要擔驚受怕，唔想驚就買 CX 、 JAL 五千幾蚊一個人既飛，我見有好多人買左 AI 之後又話人成日遲飛又話有印度味又話 D 野唔好食又話 D 空姐唔掂又話架機好舊！
關於 Delay，我開頭都好驚，因為飛之前果個星期六遲左 18 個鐘！後尾睇返報紙知道原來有恐佈襲擊，可能就係因為咁要檢查好多野~ 好好彩到我上機果日無遲呀~
關於上到機既氣味同野食問題，味係有既，係果 D 平時行街經過 D 印度人果陣「香」味，我同美寧都認為無咩唔妥，因為上到機好快就會適應左，都唔係話難聞丫！至於 D 野食呢~ 唔好食，但都唔算話難食，無要求的話入得口食得飽既~ 唔會話難食到入唔到口，當然都仲要睇番個人口味啦！D 空姐確實係一個嬸嬸，仲有叔叔添~ 態度係粗豪一 D，但係都唔等於服務唔好！架機都唔係話好舊丫，坦白講，人家俾得架機飛上天，相信都無咩大問題既！
如果會租車
玩既朋友，記住入油同泊車都要格價，同一個牌子既油站唔同地方都可以唔同價，我今個行程最平見過 120円/L，都見過 135円/L，如果你係渣幾日車的話不防頭一兩日格下價，大概知個走勢，一見到平既就入左先，半缸照入，因為往往見平唔入到你想入果陣就搵唔到平油站架喇！
同埋還車前要入滿油，還車附近 D 油站一定係最貴，所以最後一缸油入得越少越著數，油站個人彈完槍仲會不停咁入到入唔到為止既！除非你識叫佢彈完槍唔好再入啦~ 哈哈！
至於停車場，趕時間既就無計啦~ 有位就好泊！停車場價錢比油價上落仲大，大街邊可以 300円 20 分鐘，兜過橫街可以 200円 2 個鐘！所以如果渣住架車唔趕時間的話就入 D 好細條既橫街睇下，話唔定有意外收獲！分分鐘泊一日等於出面泊一個鐘！
(白浜三段壁)
好多人都講過架喇，佢自己本身個停車場係要錢既，要買滿唔知幾多錢野先會有一個鐘優惠！建議如果你係由千XX果邊過去的話，過左三段壁有個紅綠燈既右手邊果個車場唔使錢，之後唔使沿馬路行架，旁邊有條路係通向海既，行入去就到三段壁架啦！
(神戸三宮駅附近)
好多人都會去神戸吃下神戸牛，如果渣車又不防泊遠少少，其實行去有野吃既地方都係 5 分鐘左右啦，因為當你入左去三宮駅附近呢，真係無乜位俾你泊！
(京都八阪神社)
平日泊車好似唔使錢，因為我駛架車入去到我走都無人理我！至於星期六同星期日就好似頭一個鐘唔使錢，之後好似都唔平，不過如果齋行八阪一個鐘應該夠用！行得耐既八阪附近有街錶！
(京都清水寺泊車)
上到寺有兩個停車場， 800円一個鐘，勁貴，不防落左山再兜多個圈，山腳紅綠燈位轉上寺果個角落頭有個停車場好似 200円半個鐘，不過就要行10 分鐘左右上山，可以接受既，想近 D 有一個仲平，就係過左呢個停車場，留意右手邊有個路口仔，轉入去如果無記錯好似有 100円 20 分鐘！祝你好運！
(京都花見小路)
呢邊泊車真係有 D 貴，不過黃天不附有心人，俾我搵到個平野，200円泊 2 個鐘，不過得兩個位咁大把，睇下你彩數啦！前前後後都有 D 平野既，總之都係果句，唔好泊大街！
